ما زالت تسريبات التسجيلات التي ” تفضّل ” بها بعض أعضاء نداء تونس تثير ردود أفعال عديدة ومختلفة . لكن يبدو أن أغلب الآراء أجمعت على أن محتوى تلك التسجيلات التي التقطت بأحد اجتماعات الحزب تدلّ على أن مستوى الخطاب السياسي قد انحدر إلى الدرك الأسفل لدى بعضهم .
ولعلّ ما يشدّ الانتباه في هذه التسريبات ما جاء منسوبا إلى ” قيادي ” الحزب عن النهدية عماد أولاد جبريل الذي قال كلاما في غاية الخطورة ولم يسبق للتونسيين أن سمعوه حتّى في عهد الدكتاتور على غرار أنه ” يتعامل مع الناس في المهديّة بالكفّ ” مثلما يفعل النائب الحمزاوي في القصرين …
وتحدث النائب أيضا عن طريقة الانتدابات وعن ناجي جلول الذي لم يعد ” يقضيلهم ” وعن سمير الطيب الذي ” ينسب المطر لنفسه ” … وعن الوزير الذي كان قبله وكان ” يقضيلهم خير من سمير الطيب ” … وعن الحبيب الصيد ونداء تونس الذي قال إنه لا يوجد لا في الحكم ولا في المعارضة … وعن رئيس الحكومة يوسف الشاهد الذي قال إنه خان الحزب … وعن التحوير الوزاري الذي تعهّد النائب ببذل كل ما في وسعه من أجل أن يسقط في الماء … إلى غير ذلك من كلام أثقل من الجبال .
ودون الدخول في المزيد من التحاليل والتعاليق إليكم أهم ما جاء في هذا التسجيل الكارثة حيث قال السيد النائب وقد تركناه مثلما جاء بلهجة دارجة ” فصيحة جدا ” :
” … ناس لعبت بينا كيما حبّت … ناس كوّرت بينا كيم حبّت … وهذا الكلام قلتو لرئيس الحكومة يوم مشينا لمناقشة التحوير الوزاري وقتلو زادة لسفيان ( طوبال طبعا ) : راني حاسس اللي اللعبة ملعوبة وحاسس اللي ماشين باش ناخذو البنج من عندو … وكيف دخلتلو أوّل كلمتين حكاهم تأكدت اللي البنج بدا يعطي في مفعولو … اليوم كي تعمل إنت تحوير … ويني التكنولوجيا … ها الوزير هذا فاش يعمل؟؟؟ متاع الصحة عندها 30 سؤال شفاهي في المجلس ونتحداها كان تجاوب على واحد منهم … والإنتدابات مؤخرا مدير سبيطار دخل لحزب آفاق تونس ويحضر البارح برك اجتماع ياسين إبراهيم … وهذا دليل على أنّو آفاق تونس يحكم أكثر من نداء تونس … اليوم وزير الفلاحة هذايا يبيع في الكلام … سمير بالطيب كي كان لبرّة مصلّي ع النبي في البلاتوات الكل … الراجل ينسب في المطر لروحو… المطر تصب وهو ينسب فيها لروحو … الوزير السابق اللي كنا نتّهمو فيه اللي هو نهضاوي كان يقضيلنا نداء تونس أكثر منّو هو … الكلمة اللي قلتها لسي الحبيب الصيد باش نقولهالك ليك إنت سي حافظ … ماو قال فمّة معتمد قالّي إرحل … آش قلنالو أحنا سي الحبيب الصيد … قلنالو كان جات عندك هيبة وقدر وقيمة راهو المعتمد ما تجرّأش عليك … اليوم نداء تونس يا سي حافظ كي البهيم القصيّر… لا يشاوروه … لا يناوروه … كان جاء عندو قوة وفاعلية راهو السيد رئيس الحكومة ما يتجرّأش باش يعمل هذا … وشكون اللي ركّب رئيس الحكومة على نداء تونس ؟. ركّبوه نداء تونس … اليوم آني واحد من الناس نطلب في يوسف الشاهد إذا ما فمّاش 80 تليفون … تعرف آش عملّي ولّا لا ؟… عملّي ” أبّال ” … هو طلعلي يوسف الشاهد آني جيت نهزّ وهو علّق … رجعتلو بالوقت ما يهزّش عليّ باش غدوة يقلّي هاني طلبتك ما هزّيتش عليّ … وقعدت نكلّم فيه لنصف الليل … اليوم عندك معتمدية مختوقة إسمها الشابة … لا تتعدى منها لا تعمل فرح لا تدفن ميّت لأنّو البرادعة مسكّرة الكيّاسات الكل اللي تهزّ للشابة وصفاقس … سي ناجي جلول بارك الله فيه يهزّ عليّ التليفون … لكنّو ما يقضيليش قضية … أنا يا سي حافظ فدّيت من دور الكلوشار والباندي في المهدية … نحب نولّي نهار عضو مجلس نواب … هاو جاء بحذايا سي أنيس غديرة … آني نتعامل بالكف في المهدية على خاطر ما عنديش حزب … ولّيت حمزاوي 2 … ماو الحمزاوي يضرب بالكف في القصرين … آني وليت هكاكة … اليوم لا نحكموا ولانا في المعارضة …اليوم أحنا كي المثقف التونسي اللي يهبط من دار الصحفي ماضي ساعة متاع الليل … يحوّس في الشارع وحدو … لا فاهم روحو دارو فين .. ولا وين باش يمشي … وغدوة آش باش يعمل … اليوم آني باش نقول حاجة واحدة : والله العلي العظيم ما نعمل كل ما في وسعي داخل الكتلة وخارج الكتلة ومع النواب الكل أنّو ها التحوير ما يتعدّاش … هاذي الأولى … ثنين آني ما عادش منضبط لا للحزب ولا للكتلة … و اعتبروني من اليوم بعد اللي صارلي في المهدية اليوم والكرطوش يخيّط في البرادعة …والناس تسب فيك نداء تونس … ويقولوا هاو شكون انتخبنا وهاو باش يكافؤوا فينا … اليوم سي حافظ ما عندك حتى مقر في ولاية المهدية محلول … الكلها سكرت … اليوم نتعمّدوا في مجلس النواب باش نهاجموا الحكومة باش نكسبوا شوية شعبية مع العباد … اليوم يوسف الشاهد هو اللي خاننا موش أحنا اللي خنّاه …” .
وطبعا هذا جزء من هذا الكلام المسجّل الذي لا نملك أمامه إلا أن نقول : إذا كانت هذه سياسة وتدار بهذه الطريقة فبئس السياسة وبئس مصير التونسيين الذين ما زالوا يؤمنون بالسياسيين .
